कविता - बालगीत - 🌷 ' खारूताई ' तारिख - गुरुवार, ८ फेब्रुवारी २०२४

कविता - बालगीत - 🌷 ' खारूताई '

कवयित्री -तिलोत्तमा विजय लेले

तारिख - ८ फेब्रुवारी २०२४

वेळ - संध्याकाळी ६ वाजून ०९ मि.

खारूताई ओ खारूताई,

कशा आहात तुम्ही ?

झुपकेदार शेपटी घेऊन,

कुठे निघाल्या तुम्ही ?

सर-सर झाडावर चढता ...

तुरूतुरू लगबगीने जाता ...

घाबरुन सगळीकडे बघता ...

धारदार दातांनी कुरतडता ...

खारूताई ओ खारूताई,

काय काय खाता तुम्ही ?

दिवसभर चरत बसता,

सांगा, कसं पचवता तुम्ही ?

खारूताई ओ खारूताई,

काय तुमच्या पाठीवरती ?

डिझाईन हे चट्टेरी-पट्टेरी,

सांगा, काढले तरी कुणी ?

इवलुशा हाती दगड अन् माती,

उचलून खारूताई पुलावर टाकी

प्रत्यक्ष देवालाही मदत केली ...

'खारीचा वाटा'म्हणून नोंद झाली !

देवाने उचलून पाठ थोपटली ...

पाठीवर रामाची बोटं उमटली ...

तुमचे योगदान अजरामर झाले,

अन् पाठीवर मायेचे पट्टे उमटले ...

🌷@तिलोत्तमा विजय लेले

🙏🕉️🔆