कविता - 🌷 " असाही एक वाढ-दिवस " तारिख - १२ मे २०१७

कविता - 🌷 " असाही एक वाढ-दिवस "

कवयित्री - तिलोत्तमा विजय लेले 

तारिख - शुक्रवार, १२ मे २०१७

कितीही ठरवलं तरी सर्वच्या सर्व गोष्टी,

ठरलेल्या त्या-त्यावेळी होतीलच असं नाही ...

त्या जिद्दीनं तशा घडवून आणणं, वेगळं,

अन् सगळं आपोआप घडून येणं, निराळं ...

दोन्ही मध्ये अंतर आहे जमिन-अस्मानाचं ...

आपोआप सारं-काही जुळून घडण्यावरच,

तिचा नेहमीच, अधिकाधिक असायचा भर ...

झुकतं माप कायम अध्यात्मिक "अधिष्ठानावर" ...

तिच्या जरुरी-कामांची यादी तर लांबच लांब ...

ती लवकर संपायचं‌ काही नव्हतं नामोनिशाण ...

उलटपक्षी हनुमानाच्या शेपटी-सारखी यादी,

दरेक दिवशी, खूप लांब वाढंतच जात होती ...

शेवटी चार डिसेंबरचा उगवला खास-दिवसही,

अन् मैत्रिणींच्या घोळक्यात, मजेत गेला जरी ...

तिचा हा पहिलावहिला असा होता वाढ-दिवस,

जो तिच्या प्राणप्रिय पिल्लांपासून, खूपखूप दूर ...

साजरा केला गेला होता, एकटिनं ओढून-ताणून ...

चेष्टा-मस्करीत, चेहर्यावर हसरा-मुखवटा चढवून ...

वाढदिवशी देहानं जरी, बिल्कुल मुंबापुरीतच होती,

केंव्हाच भुर्रकन उडून ती, मनानं रमली होती परदेशी ...

🌷@तिलोत्तमा विजय लेले 

🙏🕉️🔆