कविता :🌷' पखरण आनंदाची '

कविता : 🌷' पखरण आनंदाची '

कवयित्री : तिलोत्तमा विजय लेले

तारिख : सोमवार, २७ मार्च २०२३

युगायुगांचं अविरत हे सृष्टीचं काल-चक्र

स्वार्थी-कृतघ्न मनुष्याचं वेगळंच दुष्ट-चक्र

कैक अक्षम्य अपराध केले निसर्गाविरुध्द, 

तरी ओंजळ-भरुन लाभे संपदा, निसर्गदत्त!

वसंत ऋतूच्या आगमनाने नटतो निसर्ग

वृक्षवेलींना लालसर पालवीनी येतो बहर 

आंब्याच्या फांदी-फांदीवर फुलतो मोहोर

सण-वारांमुळे सदा-सर्वदा आनंदी-प्रहर !

ग्रीष्म ऋतूत वटपौर्णिमा-आषाढी एकादशी

वड-पूजा, जणू एकरूप होणं सृष्टी-देवतेशी

आषाढीला भक्तांसाठी पंढरपूरी असते काशी 

विठ्ठल-रखुमाई-दर्शने जळती पापांच्या राशी !

वर्षा ऋतूसह येई नारळी पौर्णिमा, रक्षाबंधन

बहीण-भावाचं पवित्र बंधन अन् सागर-वंदन

गणेश चतुर्थी, त्या आधी हरितालिकेचं पूजन

वाजत-गाजत गौरींसह गणपती-महाविसर्जन !

शरद ऋतू म्हणजे नवरात्र, कोजागिरी, दिवाळी

नव-दुर्गा-पूजा, कोजागिरी-रात्र "को जागरती"?

प्रेमाचे लक्ष दीप उजळून, मनांची घालवी काजळी

उजाडता सूर्य-किरणे अवघी चराचर-सृष्टी उजळी

हेमंत ऋतू घेऊन येई श्री दत्त जयंती, मकर-संक्रांत

अवतरला ब्रम्हा-विष्णु-महेश यांचा त्रिमूर्ती अवतार !

संक्रांतीपासून होते सूर्याच्या उत्तरायणाची सुरुवात

गुलाबी थंडीत हुरडा-तीळगुळ-गुळ-पोळ्यांवर ताव !

शिशिर ऋतू आणतो मस्ती, होळीची अन् रंगपंचमीची 

होळीत टाकून राख होई अप्रिय-नकोशा सर्व स्मृतींची

विविध रंगात माखून, गरज नुरेल खोट्या मुखवट्यांची

रेलचेल सहा ऋतूंची-सणासुदीची, पखरण आनंदाची !

रेलचेल सहा ऋतूंची-सणासुदीची, पखरण आनंदाची !

@तिलोत्तमा विजय लेले

🙏🕉️🔆