कविता : 🌷' रुंजी '

कविता : 🌷' रुंजी '

कवयित्री : तिलोत्तमा विजय लेले 

तारिख : शुक्रवार, १० मार्च २०२३

वेळ : ११ वाजून ०४ मि.

या फुलण्यावर अन् हसण्यावर

जीव खुळा जडला रे 

जीव वेडावला रे 

छंद मला जडला रे ll धृ ll

हसरे डोळे, खुणावती हे

मूक संमती देती

गो-या गो-या गालांवरती

नकळत गुलाब फुलती 

हळव्या माझ्या मनात रुंजी

घालतील गं तारे ll १ ll

 निळ्या नभात गूढ कुणीतरी

 शीळ घालीत येई

 इवल्या इवल्या पंखांवरती

 रंगपंचमी झाली 

 इंद्रधनुचे सात रंगही 

 त्यात मिसळूनी गेले ll २ ll

 शुभ्र सुंदर चांदणं लेवून

 रात पुनवेची आली 

 चांद सखा हा घिरट्या घाली

 सखीच्या अवती-भवती

 प्रीतिसंगम दिव्य असा हा

 मनास मोहविते रे ll ३ ll

 श्रावणधारा रिमझिम पाऊस

 मनमोर फुलवी पिसारा

 हिरव्या हिरव्या गर्द रानी,

 टप टप पडती धारा 

 तृप्त झाली धरणी माता

 स्वर्ग भूवरी उतरे ll ४ ll

 

@तिलोत्तमा विजय लेले 

🙏🕉️🔆