कविता - 🌷 ‘ दुष्टांसाठी आम्ही धुरंधर ! ‘ तारिख - २७ ऑगस्ट २०२१

कविता - 🌷 ‘ दुष्टांसाठी आम्ही धुरंधर ! ‘

कवयित्री - तिलोत्तमा विजय लेले

तारिख - शुक्रवार २७ ऑगस्ट २०२१

वेळ - रात्रीचे ९ वाजून ५५ मिनिटे

पंख छाटले नियतीने जरी 

आक्रसले ना माझे अंबर,

कंबर कसूनी झेप फिरुनी,

नाही कसलेच अवडंबर !

अगणित घाव पचवूनही, 

हसत-मुखे सामोरे होऊ

आकाश-पाताळ एक करुनी,

शर्थीने लढू आम्ही शिकंदर !

अनंत यातना सहूनही, 

ताठ कण्याने जगून दाखवू

आले बहु, येतील बहु परि,

पुरून उरू आम्ही बिलंदर !

होत्याचे नव्हते झाल्यावरही 

राखेमधूनी, विश्व उभारू

कधी न डगमगू, कधी न बिथरू,

आम्ही सारे मस्त-कलंदर !

तुफानी लाटा लीलया झेलत 

विराट रूपाचं दर्शन घेऊ,

कालिया-मर्दन सहज करुनी,

दुष्टांसाठी आम्ही धुरंधर !

🌷@तिलोत्तमा विजय लेले

🙏🕉️🔆