कविता : 🌷 ' उसनी हिम्मत ' तारिख : १७ फेब्रुवारी २०२३

कविता : 🌷 ' उसनी हिम्मत '

कवयित्री : तिलोत्तमा विजय लेले 

तारिख : शुक्रवार, १७ फेब्रुवारी २०२३

वेळ :. रात्री, ११ वाजून १८ मि.

सगळं काही ठीकठाक असताना

दुधात मीठ पडावं तसं काहीसं व्हावं,

अधिकाधिक सुखाच्या हव्यासामुळं,

हातचं सारं, उगाच निसटू लागावं !

दुरुन डोंगर साजिरे किती भासतात,

जवळून मात्र ओबडधोबड दिसतात ...

" ज्याच्या वंशा जावे तेव्हा ते कळे !"

एरवी सदैव 'पर दुःख शितल' वाटते !

आला दिवस-गेला दिवस, गणती नाही

काय करावं, कसं वागावं, थांगच नाही ...

बिघडत चाललेलं दिसूनही वळत नाही,

धरलं तर चावतं अन् सोडलं तर भुंकतं !

दुखरी नस कोणती ते शोधून न काढून

उपाययोजना करण्यात दिरंगाई करुन,

आजचं मरण उद्यावर ढकलून देऊन,

नक्की असं काय साध्य होऊ शकतं ?

गाढ झोपलेल्याला सुध्दा उठवता येतं

पण डोळ्यांवर खोटी-नाटी झापडं बांधून

झोपेचं सोंग वठवणा-या दिशाहीनाला,

वठणीवर आणायला सोळावं रत्नच हवं !

बिकट वाट वहिवाट नसावी हे समजूनही

हातावर हात ठेवून बसणं, स्वभावात नाही

कंबर कसून पदर बांधून पाऊल पुढे टाकून,

हीय्या करुन लढायला, उसनी हिम्मत हवी !

🌷@तिलोत्तमा विजय लेले

🙏🕉️🔆