कविता 🌷 ' बाप्पाचं मनोगत ' ६ सप्टेंबर २०१६

कविता - 🌷 " बाप्पाचं मनोगत "

कवयित्री - तिलोत्तमा विजय लेले

तारिख - ६ सप्टेंबर २०१६

प्रत्येक जण येतो, मला सांकडं घालतो 

कधी कोणी मणभर सोन्यानं ही मढवतो 

तर कधी कोणी चांदीची ' तुला 'सुद्धा करतो !

जितके भक्त तितके नानाविध प्रकार ...

कुणा एकीला हवा " नवलखा हार " 

तर कुणाला हवी नवी, महागडी कार ...

सारा येऊन जाऊन फक्त व्यवहार ...

मी बाप्पाला हे देईन अन् ते देईन ...

सुरुवात होते ती, " मी एक-भुक्त राहीन "

अथवा " दिवसभर मी अगदी उपाशी राहीन" 

मग मजल जाते ती थेट, " मी निर्जळी करीन" !

हर एक जण म्हणतोय " बाप्पा तू मला पाव "

मग भले तो कोणीही असो, रंक अथवा राव 

अगदी असला जरी तो अट्टल चोर अथवा साव 

कोणताही असो त्यांचा प्रदेश, शहर अथवा गाव ...

करतात धावा, " देवा धाव रे धाव "...

कुणी नाही विचारत, " देवा, तुला काय हवं...."

सहन करूनही महागाईचा बेसुमार भडीमार,

प्रत्येक प्रसादात तेल, तूप अन साखरच फार !

का हो वाढविता तुमच्या-माझ्या तनुचा भार ?

लोकल चुकल्यावर, बॉसला द्याल कारणं हजार

नको वाह्यात नाचगाणी अन् नको कर्कश्य लाऊड-स्पीकर ...

नको फटाक्यांचे कर्कश आवाज अन् गुदमरून टाकणारा धूर ...

नको त्या वाजत-गाजत मिरवणुका, नाहक पैश्यांचा चक्काचूर ...

म्हणायला सगळेच भक्त, पण खरी भक्ति मात्र शून्य ...

रोषणाई करून त्यांना वाटतं, जीवन झालं धन्य ...!

पाण्यासारखा पैसा खर्चून, होतात "धन्य-धन्य"...!

मला प्रसन्न करण्याचे, आता तरी शोधा मार्ग अन्य 

आता बाप्पाच करतोय विनवणी भक्तजनांना ...

लक्ष द्या, छाटून टाका साऱ्या वायफळ गोष्टींना ...

सण म्हणजे मना-मनातील आनंदोत्सव...

त्यासाठी करु नका त्या निसर्गाला ऊपद्रव...

टिळकांनी ज्या उदात्त हेतूनी सुरु केली ही प्रथा ...

सद्य-भ्रष्ट-रूप पाहून, लाजच वाटेल की हो आता...

आप्त स्वकीय जमवून बांधा " मानस-पूजा "...

असू नये कधी फुकाचाच गाजावाजा...

नैसर्गिक गोष्टी प्रिय-मज, बेत असावा साधा...

साजरा करा सण असा, अन् चाखा खरी मजा ...

खोट्याचा लवलेश नको, कृत्रिम-पणाची मज बाधा ...

नको बडेजाव, साधेपणातली काही औरच मजा...

छोटिशी बाळस्वरूप-मूर्ती स्वयं हाती बनवा...

त्यालाच शेंदूर, हळद अथवा हिरवा पाला लावा...

नैवेद्यास दूध, दही, गूळ-खोबरं किंवा सुका-मेवा...

मी आणि अवघी निसर्ग-देवता प्रसन्न होऊ तेव्हा ...!

विसरून जा पूर्वी जेजे झाले, गेले अन केले...

आता जर निसर्ग-दत्त गोष्टीनी माझे पूजन केले,

जिथे दोन हस्तक व एक मस्तक असे झुकलेले,

तेथे माझे " वास्तव्य " नक्कीच असते ठरलेले ...

तेथेच माझे " वास्तव्य " नक्कीच असते ठरलेले ...!

🌷@तिलोत्तमा विजय लेले

🙏🌷🕉🌅