कविता - 🌷 " अंतर्-गाभाऱ्यात " तारिख - मंगळवार, ७ फेब्रुवारी २०१७

कविता - 🌷 " अंतर्-गाभाऱ्यात "  

कवयित्री - तिलोत्तमा विजय लेले 

तारिख - मंगळवार, ७ फेब्रुवारी २०१७

अगणित छोट्या-छोट्या गोष्टी ...

अगदी लहान- सहान अतिसूक्ष्म-कृती ...

विनासायास, अलगद, आपोआप, सहज ...

क्षणार्धात पोहोचतात त्या विधात्यापर्यंत, नक्की ...

तो पण देतो त्याची पोच-पावती ...

विविध-रूपांनी, भिन्न-भिन्न अलौकिक रीतींनी ...

श्वास रोधून, डोळे विस्फारून मंत्रमुग्ध करणा-या सृष्टी-सौंदर्यानी

झाडांच्या हलक्याश्या, सळसळीतून ...

पक्षांच्या कर्ण-मधुर जादूई किलबिलीतून ...

सूर्याच्या सोनेरी, कोवळ्या-कोवळ्या उन्हातून ...

उगीच अंगभर पसरणाऱ्या हलक्याशा-गोड शिरशिरीतून ...

मोहक निरागस हास्यातून ...

आकाशाच्या गर्द निळाईतून ...

झुळकीबरोबर डोलणाऱ्या, वेलींतून ...

उमलणाऱ्या फुलांच्या, दरवळणाऱ्या सुगंधातून ...

चंद्र-चांदण्यांच्या आकर्षक लुकलुकण्यातून ...

बी मधून बाहेर फुटणाऱ्या, अंकूरातून ...

सूर्याच्या उगवण्या-मावळण्यातून ...

हिमाच्छादित पर्वत-रांगांतून ...

डौलात वाहणाऱ्या नद्यांमधून ...

धबधब्याच्या कोसळणाऱ्या शुभ्र जलातून ...

डोहाच्या सखोल, संथ-संयत अचल स्थिरतेतून ...

देहात नखशिखांत झंकारणाऱ्या तरल स्पंदनांमधून ...

या आणि अशाप्रकारच्या अनेकानेक,

लक्षावधी रूपांतून तो जणू अलगद पावती देत असतो ...

प्रत्येक सूक्ष्मातिसूक्ष्म जीवास एक निस्सीम श्वासाचं,

कवच-कुंडल बहालं करीत असतो ...

अनंत रूपे-अगणित हस्ते गुप्त-संदेश देत असतो ...

या जगती, कोणी कधीही नाही-एकाकी-एकटा-दुकटा ...

बिनधास्त होऊन, बिन-दिक्कत पुढचं पाऊल टाका ...

मी सदा आहे स्धित तुमच्या अंतर्-गाभाऱ्यात, कायम साथीला ...

🌷@तिलोत्तमा विजय लेले 

🙏🕉️🌅