कविता : 🌷 ' साकडे '

कविता - 🌷‘साकडे‘

कवयित्री - तिलोत्तमा विजय लेले

तारीख - शनिवार, १४ सप्टेंबर २०१९

वेळ - १० वाजून ५३ मि.

आई अंबाबाई तुला घालिते गं साकडे,

भूल-भुलैया दुनियेचे मोहमयी गं रूपडे

अनोळखी रस्ते, अस्ताव्यस्त पसरलेले

निरागस जीवाला फसविण्यास टपलेले

अवघी अंधेर-नगरी कुणी कुणाचा नाही

हळव्या पाडसांना तुझाच आधार गं आई 

साता जन्मांची पुण्याई आली फळाला

म्हणून तुझा वरद-हस्त आम्हां लाभला 

तव दर्शनाच्या ओढीने जीव गं आतुरला

तव कृपा-वर्षा होता भक्तिभाव अंकुरला

सौभाग्याने पदरी चंद्र-सूर्य गं झळकले,

झाकोळले कधी आकाश, तेज चमकले

तुफानी लाटांनी जरी तांडव नृत्यही केले,

तव आशिर्वादाने, मन कधी न डगमगले !

पहाटे-पहाटे अंधार संपून तांबडे फुटू दे

सारं काही सुकर-सफल उजळून निघू दे

अज्ञानी-अबोध लेकरांस सद्बुद्धी देई माते 

वाट चुकलेल्या जीवांना, सन्मार्ग लाभू दे !

हाक मारली आता निश्चिंत मन हे झाले,

सत्कर्मी जीव रमून जीवन-सार्थक झाले 

आईच्या कुशीत मज निज-रूप ते दिसले !

डोळे मिटून सद्चिदानंदी एकरूप ते झाले

🌷@तिलोत्तमा विजय लेले

🙏🕉️🔆