कविता : 🌷' खर्या भक्तीचा भुकेला '

कविता :🌷 ' खर्या-भक्तीचा भुकेला '

कवयित्री : तिलोत्तमा विजय लेले 

तारिख : मंगळवार, ४ एप्रिल २०२३

वेळ : दूपारी, ४ वाजून ५२ मि.

जो निर्गुण, निराकार, अनादी, अनंत

असा तो परम शक्ती-शाली भगवंत !

सर्वत्र जो असतो भरुन पूर्ण आसमंत

त्या शोधण्याचा ध्यास, कठीण अत्यंत !

बाळाच्या भाबड्या हास्यातून तो दिसतो

पिलांच्या गोड किलबिलाटातून ऐकू येतो

मातीतल्या इवल्याशा अंकुरातून प्रकटतो !

नवजातासाठी मातेमध्ये दुग्धांमृत निर्मितो !

रवी-किरणांनी मिट्ट काळोखी-रात्र संपवतो

पर्जन्यवृष्टी करून धरेला शांत-तृप्त करतो !

जीवितांसाठी पिकांमधे अन्नरुपी-दाणे भरतो

शीतल चंद्र-प्रकाश बनून तप्त-दाह घालवतो

फुला-फुलामध्ये नयन-रम्य रंग-सुगंध भरतो

पाना-पानागणिक मधुर, रसाळ फळं निर्मितो

माणसांची-पशु-पक्षांची भूक-तृषा भागवतो !

रणरणत्या उन्हात वृक्षांची छाया बनून रक्षितो 

प्रत्येक जीवित जीवात, तो अंश-रुपात असतो !

मग तो जीव कितीही लहान अथवा मोठा असो

मुंगी, अमिबा वा अवाढव्य हत्तीतही तोच असतो 

नदी-ओढा-झरा, अथांग सागरातही तोच असतो 

कशात आहे, पेक्षा कशात नाही हे शोधणं जरुरी

कारण ज्याच्यात तो नाही असा एकही जीव नाही

तंटा-वाद-लढाया-युद्धं येथे तो नक्कीच असत नाही 

अन्याय-शोषण-दहशत जेथे, तो असणं शक्य नाही !

तो खर्या-भक्तीचा भुकेला, ऐश्वर्यादी-स्तोमांचा नव्हे

भक्त धृव-प्रल्हाद यांच्या हाकेला भगवंत धावून गेले !

दोन हस्त अन् मस्तक जेथे विनम्र-भावाने जोडलेले,

ईश्वर "न मागून-न बोलावूनही हजर," पक्के ठरलेले !

@तिलोत्तमा विजय लेले

🙏🕉️🔆