कविता : 🌷' कोंडी '

कविता 🌷' कोंडी '

कवयित्री : तिलोत्तमा विजय लेले

तारिख : बुधवार, २६ एप्रिल २०२३

वेळ : दुपारी, २ वाजून ४५ मि.

कधी कधी वाटतं आपणच आपल्या भोवती कुंपणं बांधतो

आपल्या विचारांना, मनाला, अंतर्गत शक्तींना बांधून ठेवतो !

स्वच्छंदीपणे, मोकळ्या आभाळात कल्पनांचे पंख पसरून

बिनधास्त होऊन मुक्तपणाने संचार करत, आनंदाने हरखून

खरा जीवन-अर्थ उकलूनही आयुष्यात उत्कर्ष होऊ देत नाही 

मनाची कोंडी, अंतर्यामी-असंतुष्टी यांचा दोष कुणालाच नाही !

कोळी जसा भलं मोठं जाळं विणतो भक्ष्यांना पकडण्यासाठी,

पण कधी-कधी स्वतः त्यात गुरफटून, धडपडतो सुटण्यासाठी !

अशीच काहीशी विचित्र अवस्था होते भल्या-भल्या माणसांची,

कोषातून बाहेर पडण्याची केविलवाणी-जीवघेणी धडपड त्यांची !

स्वतः होऊन घातलेल्या बंधनांच्या-कर्तव्यांच्या ओझ्याखाली दबून

दिवसा-मागून-दिवस दवडून असहाय्यपणे निष्क्रिय जीवन जगून,

मोकळा श्वास घेण्याच्या, असफल स्वप्नांच्या-अनिद्रेत तडफडतो !

बंदी नसताना अदृष्य बंदीवासात, भ्रामक-कर्तव्यांचं-पालन करतो !

काय बरोबर, काय चूक या गहन प्रश्नांच्या गुंत्यात अडकून न पडता,

तीढे-पेच-सोडून आला क्षण पूर्ण न्याय देऊन, आला पाहिजे जगता !

सर्वांत दोषी कोण, स्वतः-कोळी, जाळं, त्याच्या भ्रामक समजूती ?

का सर्व बाजूंची बंधनांची कोंडी फोडून स्वतंत्र श्वास घ्यावा जगती ?

काय बरोबर, काय चूक या गहन प्रश्नांच्या गुंत्यात न पडता अडकून,

तीढे-पेच-सोडून आला क्षण पूर्ण न्याय देऊन, पाहिला पाहिजे जगून !

@तिलोत्तमा विजय लेले

🙏🕉️🔆